Jakin-mina eta errenditu ezina berezkoak zituen Manuel Iradier gasteiztarrak (1854-1911). Livingstone, Burke, Stanley eta abarren miraz, Afrikako mapa zuriunez betea zen bere esploratzaile ametsen izara. 20 urte zituela, 1874an, emaztea eta koinata bidaide, Gineako Golkora menturatu zen. Umezurtz erabateko, ez inoren eta ez inongo ordezkari. Eta aurrez beste inor baino barrurago sartu zen Muni ibaiaren lurraldean, ia hiru urteko bidaian.

Ramon Olasagasti (Berrobi, 1972) Informazio Zientzietan lizentziatua da. Euskaldunon Egunkarian eta Berrian kazetaria; mendian eta bidaietan espezializatua. Aipatzekoak dira argitara emandako hainbat liburu: Sei arrasto Eskandinavian, Hiru pauso, hiru norabide, Josune Bereziartu. Hatz puntak eta Mendiminez (Tene Mujika sariaren irabazlea). Hainbat aldizkaritan kolaboratzaile: Euskal Herria, Desnivel, Gure Mendiak.