Tentazioak eta Korapiloak bere bi ipuin-bilduma arrakastatsuen ondotik, nobelari ekin dio Jasone Osorok oraingoan, eta Greta izeneko istorioa kaleratu. Greta liburuko pertsonaia inportanteenetakoa da, baina ez da pertsona: maniki bat da, urtetan arropa-denda bateko eskapartatean egondakoa, eta orain Oskarrek bere etxean gordetzen eta zaintzen duena. Goxotasunezko harreman berezia du Oskarrek Gretarekin: ez –gaizki-pentsatu batek usteko duenez– sexuaren alorrekoa, baina bai txikitan galdu zuen amaren nolabaiteko ordezkotza bilatuko balu bezala. Oskar, baina, ezkontzera doa, betiko andregai izan duen Anarekin. Anak ulertzen du Oskarrek Gretarengana sentitzen duena, baina halako batean gehiegizkoa iruditu eta hautatzera behartzen du: edo Greta edo ni.

Jasone Osoro (Elgoibar, 1971). Kazetaria da lanbidez. Prentsan eta telebistan lan egin du. Literaturan bi ipuin liburu idatzi ditu: Tentazioak eta Korapiloak. Nobela bat: Greta. Biografia bat: Isadora Duncan. Eta gazte-literaturan bi nobela: Jara eta Jara Bartzelonan.